Ադրբեջանի վերահսկողությանն անցած տարածքներում մշակութային ժառանգությունը վտանգված է: Այսօր Երևանում քննարկել են հակառակորդի կողմից օկուպացված տարածքներում հայկական հուշարձանների ոչնչացման դեմն առնելու ուղիները: Արցախի ու Հայաստանի մշակույթի համար պատասխանատու պաշտոնյաները հայտարարել են, որ Արդբեջանն իրականացնում է նոր ցեղասպանություն, ուստի նրա հետ բանակցելն անիմաստ է:
ՊԵԿ նախագահը հաստատել է տեղեկությունները, որ Սյունիքի նախկին մարզպետ Վահե Հակոբյանի կնոջը հարցաքննել են, սակայն դա քաղաքական ճնշում չի համարել: Էդվարդ Հովհաննիսյանից բացի՝ ԱԺ-ում այսօր լրագրողների հարցերին պատասխանել են նաև պատգամավորները: «Իմ քայլ»-ից Նիկոլայ Բաղդասարյանը պարզաբանել է, թե ինչ հիմքով է Նիկոլ Փաշինյանը շարունակելու հրաժարականից հետո կատարել վարչապետի պարտականությունները: ԲՀԿ-ական Միքայել Մելքումյանը վերահաստատել է՝ «Բարգավաճ Հայաստան»-ը հաղթելու է խորհրդարանի արտահերթ ընտրություններում, Գագիկ Ծառուկյանն էլ լինելու է պետության ղեկավար:
Լաչինի շրջանը Ադրբեջանին հանձնելուց 5 ամիս անց բերձորցիները շարունակում են պայքարել ապահով տանիքի համար: Սակայն կռիվը հիմա թշնամու դեմ չէ: Պատերազմի միջով անցած ընտանիքները խնդրում են թեկուզ ժամանակավորապես իրենց հնարավորություն տալ ապաստանել Նորքի այգիներ 180 հասցեում գտնվող շենքում: Այն բարեկարգելու համար արցախցի ընտանիքներն իրենց ամբողջ գումարն ու պետությունից ստացած աջակցությունն են հատկացրել: Վերջերս, սակայն, ոստիկաններ են եկել, շենքից դուրս գալու համար ժամանակ տվել. կառույցը պատրաստվում են աճուրդի հանել:
Երկիրը ճգնաժամային իրավիճակից հանել հնարավոր է միայն միասնության և մեկ գաղափարի շուրջ համախմբվելու միջոցով: Սա երկրի բարօրության համար պայքարում «Բարգավաճ Հայաստան» կուսակցության հետ ուժերը մեկտեղելուն ուղղված նախաձեռնությունների կարգախոսն է: Հասարակական տարբեր հոսանքների հարող քաղաքացիները ներկայացրել են ճգնաժամից դուրս գալու ուղիների վերաբերյալ իրենց պատկերացումները:
Ո՞ր տարածքում է ի վերջո գտնվում այն վայրը, որտեղ Ալիևների ընտանիքը լուսանկարվել էր՝ հաստաբուն ծառը ջերմորեն գրկած: Սոցցանցերի հայկական հատվածում կարծիքներ են հրապարակվել, որ ֆոտոսեսիան արվել է Սյունիքի մարզի Սոսիների պուրակում: Շրջակա միջավայրի նախարարությունը, սակայն, հայտարարել է, որ տարածվող լուսանկարը «Սոսու պուրակ»-ի հետ կապ չունի: Սյունիքի մարզի Ներքին Հանդ համայնքի ղեկավար Խաչատուր Բաղդասարյանն էլ «Էպիկենտրոն»-ին ասել է, որ թեև գյուղը պատերազմից հետո սահմանակից է դարձել Ադրբեջանին, սակայն «Սոսու պուրակ»-ից ոչ մի սանտիմետր թշնամուն չի զիջվել:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv