Սյունիքի գեղեցկուհին՝ Շաքիի ջրվեժը, երեկ մեծ իրարանցում էր առաջացրել: Համացանցում տարածված կադրերում երևում է, որ ջրվեժից սև ջուր է թափվում: Շրջակա միջավայրի նախարարությունը պարզաբանել է, որ արտառոց երևույթի պատճառը ջրվեժի ավազանի մաքրումն է եղել: Շաքի համայնքի ղեկավարը «Էպիկենտրոնին» պատմել է, որ ավազանը պարբերաբար մաքրվում է, քանի որ տարածքը խիստ մամռոտ է:

Առաջիկա ամիսներին մայրաքաղաքի այգիներից մեկում կարող է նոր արձան տեղադրվել: Նախագծի հեղինակ, քանդակագործ Հայկ Թոքմաջյանը վերսկսել է դեռևս 4 տարի առաջ մեկնարկած նախագիծը: Նա այժմ շարունակում է աշխարհահռչակ System of a Down ռոք խմբի անդամների քանդակի կերտման աշխատանքը, որը նախատեսում է ավարտել մինչև տարեվերջ: Քաղաքապետարանն արդեն իսկ դրական է արձագանքել նախաձեռնությանը: Սակայն բոլորը չէ, որ ողջունում են արձանի տեղադրման գաղափարը:

Արմավիրի մարզի տասնյակից ավելի գյուղերի բնակիչներ այսօր փակել են Երևան-Արմավիր ճանապարհը: Նրանք պահանջել են հանդիպում մարզպետի կամ տարածքային կառավարման նախարարի պաշտոնակատարի հետ: Ակցիայի մասնակիցները բողոքել են, որ մոտ մեկ շաբաթ է՝ ջուր չունեն, ամբողջ բերքը չորացել է: Կարճ ժամանակում ոստիկանները բացել են ճանապարհը, իրավիճակը լարվել է: Գյուղացիների հետ հանդիպման եկած «Էջմիածին» ջրօգտագործողների ընկերության գործադիր տնօրենն ասել է, որ ջուր չլինելու պատճառը վթարն է, և ջրամատակարարումը երեկոյան ժամերին կվերականգնվի:

Պատերազմի մասնակից, շարքային Հենրիկ Ներկարարյանը արձակուրդի մեջ է: Երբ զորակոչի տարիքը լրացել էր, նա առանց վարանելու Ռուսաստանից վերադարձել է՝ իր պարտքը տալու հայրենիքին: Կռիվ է տվել ամենաթեժ կետում: Իր ծառայության և պատերազմի մասին զինվորը պատմել է իմ գործընկեր Մարիամ Ավանեսյանին:

Երաշտի պատճառով Մարտակերտի շրջանում ցանքատարածությունների 40 տոկոսն ընդհանրապես հնձի ենթակա չէ: Բերքատվությունն առաժմ ցածր է, բայց գյուղատնտեսությամբ զբաղվողները հույսը չեն կորցնում՝ իրավիճակը կարող է բարելավվել, աճել են նաև մթերման գները: