Եվ այսպես, այսօր Բաքուն ևս 15 հայ գերու է վերադարձրել Երևանին: Նրանք արդեն Հայաստանի տարածքում են: Նիկոլ Փաշինյանը Գավառում կայացած քարոզարշավի ժամանակ հրապարակել է տղաներից 13-ի անունները: «Մենք ոչ թե ականապատ տարածքների քարտեզները փոխանակել ենք գերիների հետ, այլ քայլին քայլով ենք պատասխանել»,- ասել է վարչապետի պաշտոնակատարը: 15 տղաներից 4-ը վերջերս Վարդենիսի հատվածից գերեվարվածներն են, կան նաև պատերազմի ընթացքում և դրանից հետո Խծաբերդ-Հին Թաղեր հատվածում գերեվարված զինծառայողներ: Անդրադառնալով սահմանային իրադրությանը՝ Փաշինյանն ասել է, որ հիմա քննարկվում է թե ինչ դիրքերում պետք է լինեն ռուս սահմանապահները և միջազգային դիտորդները:
Հայ Ազգային Կոնգրեսն այսօր այցելել է Շիրակի մարզ: Քաղաքական ուժի ներկայացուցիչները հանդիպում են ունեցել մարզի բնակիչների հետ, ներկայացրել իրենց նախընտրական ծրագիրը: Առաջին նախագահի թիմը վստահ է, որ երկրում ստեղծված իրավիճակը հաղթահարել հնարավոր է միայն իրատեսությամբ ու ճիշտ ընտրությամբ, հակառակ դեպքում մեր նոր աղետներ կարող են սպասել:
Հայաստանում քաղցկեղային հիվանդությունների հետևանքով մահերի մակարդակը դեռևս շարունակում է բարձր մնալ: Մեր երկրում առաջին տեղում թոքի քաղցկեղն է, դրան հետևում են կրծքագեղձի ու աղիների քաղցկեղները: Հայ բժիշկները, սակայն, շարունակում են պայքարը հիվանդության դեմ: Այդ նպատակով Հայաստան են հրավիրվել առաջատար բժիշկներ՝ Եվրոպայից ու Ռուսաստանից:
«Հանրապետություն» կուսակցության վարչապետի թեկնածու Արամ Սարգսյանը հանդիպել է Ջրվեժի բնակիչների հետ: Քաղաքական թիմի լիդերը հորդորել է քաղաքացիներին հունիսի 20-ին անպայման գնալ ընտրատեղամաս և կատարել ճիշտ ընտրություն:
Գեղարքունիքի մարզի Գեղամասար համայնքի Կութ բնակավայրում մարդիկ մտահոգված են. ինչպե՞ս պետք է իրականացնեն գյուղատնտեսական աշխատանքեր, երբ հակառակորդը մետրերի հեռավորության վրա է՝ հենց գյուղի արոտավայրերում: Չնայած անհանգստությանը՝ գյուղացիներն իրենց բնակավայրը լքել չեն պատրաստվում:
Ուղիղ մեկ ամիս է անցել Հայաստանի ինքնիշխան տարածք Ադրբեջանի զինված ուժերի ներխուժումից: Իրավիճակը սահմանին պարբերաբար սրվում է, գրանցվում են բախումներ: Հակառակորդի նկատմամբ հակազդման գործողություններ ձեռնարկելուց զատ՝ հայկական բանակը նաև ինժեներական աշխատանքեր է իրականացնում: Սոթքի դիրքերում նոր բնագծի կահավորումը շարունավում է: «Էպիկենտրոնը» եղել է Գեղարքունիքի մարզի մի քանի դիրքերում, զրուցել զինվորների և սպաների հետ, ծանոթացել սննդի և հանգստի պայմաններին:
Քարոզարշավի 6-րդ օրը «Լուսավոր Հայասատանը» եղել է Աջափնյակում: Բակային հանդիպումների ժամանակ քաղաքական ուժի անդամները ներկայացրել են նախընտրական ծրագիրը, պատասխանել լրագրողների հարցերին: Հաղթանակի դեպքում «Լուսավորը» մտադիր է բոլոր պրոֆեսիոնալներին համախմբել ու ձևավորել ազգային համաձայնության կառավարություն:
Քարոզարշավի 5-րդ օրը «Պատիվ ունեմ » դաշինքը Վայոց Ձորի մարզում էր: Քաղաքացիների հետ հանդիպման ժամանակ երրորդ նախագահ Սերժ Սարգսյանը և դաշինքի վարչապետի թեկնածու Արթուր Վանեցյանը խոսել են անվտանգային հարցերի ու բանակի մարտունակությունը վերականգնելու մասին: «Մեր երկրի անվտանգային համակարգն ամբողջովին փլուզված է, և դա սկսվել է 2018 թվականին Վայոց Ձորի մարզից, -ասել է Սերժ Սարգսյանը: