Գորիսի փոխքաղաքապետ Մենուա Հովսեփյանին ձերբակալելու որոշումը դատարանը ոչ իրավաչափ է ճանաչել: Նրա նկատմամբ խափանման միջոց է ընտրվել չհեռանալու մասին ստորագրությունը: «Սկզբունքային դատավորները հավատարիմ են մնում իրենց տված երդմանը»,- հայտարարել է Սյունիքի նախկին մարզպետ Վահե Հակոբյանը: «Իմ քայլը» խմբակցության ղեկավարն էլ Սյունիքի դեպքերը որակել է ուղղորդված: Լիլիթ Մակունցը նաև նշել է, թե երբ է հրաժարական տալու Նիկոլ Փաշինյանը և հակադարձել վարչապետի հասցեին առաջին նախագահի աղմկահարույց հայտարարությանը:
Կոտայքի մարզի Պռոշյան համայնքը պատերազմին մի քանի տասնյակ հերոսներ է տվել: Այսօր Պռոշյանում կայացել է Արցախի հերոս Վահագն Ասատրյանի անվան՝ հերոսների վերականգնողական քաղաքի հիմնարկեքը: Կառուցվող քաղաքի բնակիչներն էլ լինելու են բացառապես պատերազմում վիրավորված ու առողջությունը հայրենիքին նվիրած տղաները:
Տարածաշրջանային հարցերի մասնագետներն այսօր Երևանում անցկացրել են խորհրդաժողով «Հայաստանը և Թուրքիան Հարավային Կովկասում» թեմայով: Որոշ հայ պաշտոնյաների հնչեցրած բարեկամության կոչերը փորձագետները համարում են Հայաստանի իշխանության կողմից Թուրքիայի նախապայմանները լուռ կատարելու դրսևորում: Գիտնականներն անդրադարձել են նաև հաղորդակցության ուղիների ապաշրջափակմանը՝ մատնանշելով, թե ինչ ռիսկեր կարող է դա առաջացնել Հայաստանի համար:
Տարբեր երկրներից ժամանած հեղինակավոր իրավապաշտպանները, խաղաղասերներն ու քաղհասարակության ներկայացուցիչները Երևանում քննարկել են 44-օրյա պատերազմի հետևանքները: ՄԱԿ-ում խորհրդատվական հատուկ մարմնի կարգավիճակ ունեցող MAAT կազմակերպության անդամներն ու հայ փորձագետները ներկայացրել են միջազգային հարթակներում ագրեսոր Ադրբեջանի դեմ պայքարի արդյունավետ ճանապարհները: Ճանաչված մասնագետների խումբն առաջիկայում նախատեսում է այցելել նաև Արցախ:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv