Օլիմպիական հերթափոխի պետական քոլեջում ավարտվել է կրտսեր տարիքի պատանիների բռնցքամարտի Հայաստանի առաջնությունը: Տղաների 16 և աղջիկների 4 քաշային կարգերում մեդալների համար պայքարել է Հայասատնի բոլոր մարզերի, մայրաքաղաք Երևանի, նաև Արցախի ավելի քան 240 բռնցքամարտիկ:
Շիրակի մարզի մի քանի գյուղերի բնակիչներ առավոտյան ի նշան բողոքի փակել էին Երևան-Գյումրի ճանապարհի Բենիամին գյուղի հատվածը՝ իշխանություններից պահանջելով անհապաղ լուծել ոռոգման խնդիրը: Կեսօրից հետո Շիրակի մարզպետ Հովհաննես Հարությունյանի ու ջրօգտագործողների Շիրակ ընկերության պատասխանատուների հետ հանդիպումից հետո շիրակցիները բացել են Երևան-Գյումրի մայրուղու Ազատան-Բենիամին հատվածը:
Ռոբերտ Քոչարյանի ու Արմեն Գևորգյանի մասնակցությամբ կաշառքի գործի քննությունը մեկ ամսով հետաձգվել է: Դատավորը հայտարարել է,որ ընտրություններից հետո Քոչարյանի ու Գևորգյանի հետ կապված որոշակի խնդիրներ են առաջացել.երկրորդ նախագահն ու նախկին փոխվարչապետը «Հայաստան» դաշինքի ցուցակով կարող են պատգամավորական մանդատ ստանալ:
Գյուղատնտեսության ոլորտի խնդիրները, ոռոգման գործընթացն ու բարեփոխման ծրագրերը քննարկելու համար Նիկոլ Փաշինյանը խորհրդակցություն է անցկացրել: «Կլիմայական փոփոխություններով պայմանավորված՝ ավանդական ոռոգումը ապագա չունի: Պետք է ավանդական ոռոգումը փոխարինել կաթիլայինով»,-հայտարարել է վարչապետի պաշտոնակատարը: Նա կարևոր է համարել նաև ջրամբարների կառուցումն ու ջրի ամբարման ծավալների մեծացումը:
Հունիսի 29-ը անհետ կորած ազատամարտիկների հիշատակի օրն է: 90-ականներից մինչև այսօր անհետ կորած և զոհված զինծառայողների հարազատները, ինչպես նաև պաշտպանության փոխնախարար Արման Սարգսյանն այցելել են Եռաբլուր: Ղարաբաղյան առաջին պատերազմից հետո անհայտ ճակատագիր ունեցող Յուրի Առուստամյանի կինը՝ Զարինե Հակոբյանը,կարևոր է համարել, որ 90-ականներից անհետ կորածների հարցը ևս բարձրաձայնվի: Նա չի բառացել, որ ազատամարտիկների մի մասն այսօր էլ կարող է գտնվել Բաքվի բանտերում:
Առաջատար տեխնոլոգիաների ձեռնարկությունների միության անդամ ընկերությունները հանդես գալիս են նոր նախաձեռնությամբ: Հուլիսի 3-ից 5-ը Հայաստանում գործող ՏՏ ոլորտի ավելի քան 60 ընկերությունների ներկայացուցիչներ Արցախում կիրականացվեն գիտաժողովներ:Կբացվի նաև լաբորատորիա, քայլեր կկատարվեն նոր աշխատատեղերի ստեղծման ուղղությամբ:
Շարունակվում են Երևանն ապօրինի կառույցներից մաքրելու աշխատանքները: Քաղաքապետարանը այս հարցում հետևողական է՝ մայրաքաղաքում ապօրինի կառուցված շինություններ չեն մնալու: Հայկ Մարությանի մամուլի խոսնակ Հակոբ Կարապետյանը ներկայացրել է մինչև օրս կատարված աշխատանքը, նաև պարզաբանել է, թե ով պետք է հավաքի ապամոնտաժված շինությունների ջարդոնները: