Սյունիքում և Գեղարքունիքում, ադրբեջանական զինուժի ներկայության պատճառով, ջրային պաշարները վտանգված են: Այս մասին ԱԺ-ում լրագրողներին ասել է ՄԻՊ-ը: Արման Թաթոյանի խոսքով՝ իշխանությունը դելիմիտացիայի և դեմարկացիայի հիմքում պետք է դնի մարդու իրավուքները: «Պետք է ստեղծվի անվտանգության գոտի, բայց ոչ մեր հաշվին, այլապես հետո սահմանամերձ դարձած գյուղերի բնակիչների խախտված իրավունքները հնարավոր չի լինի վերականգնել»,- հայտարարել է օմբուդսմենը:

Աբովյանի դիահերձարանի սկանդալային տեսարանի մասին այսօր խոսել են դատաբժիշկներն ու գետենիկները: Նրանք հիմնավորել են, թե ինչո՞ւ պատերազմում զոհված հերոսների աճյունները սառնարանում չէին և ինչո՞ւ են սենյակում ճանճեր եղել: Մասնագետներն աբսուրդային են համարել խոսակցությունները, թե հանրապետական դատաբժշկական գիտագործնական կենտրոնը փորձում է թաքցնել զոհերի մարմինները:

Այսօր դպրոցներում հնչել է վերջին զանգը: Աշակերտները հարազատ կրթօջախներին հրաժեշտ տալուց առաջ նախ հարգանքի տուրք են մատուցել պատերազմի զոհերի հիշատակին: Ի՞նչ տրամադրություններ էին Երևանի 195 ավագ դպրոցում, պարզել է կրթօջախի շրջանավարտ Մարիամ Ավանեսյանը:

«Բանակցություններն ամենաբարձր մակարդակով կշարունակվեն, մինչև ադրբեջանական կողմը լքի Հայաստանի սուվերեն տարածքը»,- բյուջե 2020-ի քննարկումների ընթացքում լրագրողներին ասել է Արսեն Թորոսյանը: Վարչապետի աշխատակազմի ղեկավարն այս փուլում անիմաստ է համարում որևէ փաստաթղթի մասին խոսելը: Սկանդալային պատգամավոր Հայկ Սարգսյանն էլ մանրամասներ է պատմել նախօրեին իր հետ տեղի ունեցած արտառոց միջադեպից: Ըստ տարածված լուրերի՝ պատգամավորը խլել էր «Հրապարակ» օրաթերթի լրագրող Անուշ Դաշտենցի հեռախոսը և դիմել փախուստի:

Կոտայքի մարզում այսօր շրջանավարտները վերջին հրաժեշտն են տվել դպրոցական նստարանին ու իրենց պատանեկությանը: Աբովյան քաղաքի երիտասարդների համար հիշարժան օրն ավելի է գունավորվել Գագիկ Ծառուկյանի կողմից իրականացվող ամենամյա նախաձեռնության շնորհիվ: Նրանց վերջին զանգն այսօր Գագիկ Ծառուկյանի անունից շնորհավորել են ծաղկեփնջերով, բացիկներով և դրամական պարգևներով: Իսկ Աբովյանի Սուրբ Հովհաննես Մկրտիչ եկեղեցում օրհնվել է երիտասարդների մուտքը նոր կյանք: