Շիրակում ոռոգման ջուրը հողամասեր չի հասնում, մարզի համար աննախադեպ շոգից ու երաշտից բերքը փրկել չի հաջողվում: Կառնուտի ջրամբարում կուտակված ջրային ռեսուրսները բավարար չեն: Խնդրին լուծում գտնելու համար մարզի բնակիչները մի քանի անգամ փակել են Երեւան-Գյումրի ավտոճանապարհը, հանդիպել պատասխանատու պաշտոնյաների հետ: Այսօր ջրային կոմիտեի նախագահը Շիրակ կատարած այցի ժամանակ նշել է,որ խնդիրը շուտով լուծում կստանա:

Քարահունջ համայնքի ղեկավար Լուսինե Ավետյանի խափանման միջոցի ընտրության հարցը որոշելու վերաբերյալ նիստը հետաձգվել է: Փաստաբան Րաֆֆի Ասլանյանը տեղեկացրել է, որ փոխադարձ համաձայնությամբ հրաժարվել է Ավետյանի շահերի պաշտպանությունից: Ըստ ՀՔԾ-ի՝ համայնքապետի վերաբերյալ ընտրական մի շարք հանցագործություններ կատարելու կասկածանք է ներկայացվել: Գորիսի քաղաքապետը դատարանի բակում հայտարարել է, որ Քարահունջի ղեկավարին առաջադրված մեղադրանքը կեղծիք է:

«Մի քանի օրից Գեղարքունիքի մարզի սահմանի երկայնքով կտեղակայվեն ռուս զինվորականներ,հայ և ադրբեջանցի զինծառայողները դուրս կբերվեն»,-այս մասին հայտարարել է Գեղարունիքի մարզպետը:Գնել Սանոսյանի խոսքով՝ սահմանին իրավիճակը հանդարտ է,միջադեպեր չկան: Թե որքան պետք է ռուս զինվորականները մնան Գեղարքունիքի սահմանին՝ մարզպետը չի հստակեցրել:

Հայ-ադրբեջանական սահմանի խնդրահարույց հատվածներում ռուսաստանյան սահմանապահների ներկայությունը ընդլայնելու հարցի շուրջ առարկայական քննարկումները շարունակվում են: Այս մասին «Էպիկենտրոնին» ասել է Հայաստանում Ռուսաստանի դեսպանը:Սերգեյ Կոպիրկինի խոսքով՝ շատ կարևոր է անել այնպես,որ տեղի բնակիչները հնարավորինս հարմարավետ զգան իրենց նոր ու անսովոր պայմաններում: Կոպիրկինը նաև անդրադարձել է հայ ռազմագերիների վերադարձի հարցին:

Այսօր առավոտյան Երևանում աշխատանքն է սկսել Պարեկային ծառայությունը: Նոր համազգեստ կրող և նոր ավտոմեքենաներով շրջող պարեկները փոխարինում են Ոստիկանության Պարեկապահակային ծառայությանը և Ճանապարհային ոստիկանությանը: Ինչպե՞ս է անցել ծառայողների առաջին աշխատանքային օրը և ի՞նչ սպասելիքներ ունեն քաղաքացիները մայրաքաղաքի կարգ ու կանոնը վերահսկող նոր համակարգից՝ պարզել է Մարիամ Ավանեսյանը: