Իջևան և Լերմոնտովո համայնքները կխոշորանան, կանցկացվեն համայնքի ղեկավարի և ավագանու ընտրություններ: Այսօր տեղի ունեցած խորհրդարանական լսումների ժամանակ քննարկվել է վարչատարածքային բաժանման մասին օրենքում փոփոխություններ կատարելու նախագիծը: Լսումներին մասնակցել ու իրենց մտահոգություններն են ներկայացրել համայնքների բնակիչները: Քննարկման ընթացքում «Բարգավաճ Հայաստան» խմբակցության պատգամավոր Միքայել Մելքումյանը հայտարարել է, որ կորոնավիրուսով պայմանավորված՝ գործադիրը պետք է անցնի կառավարման արտակարգ ռեժիմի:
Կորոնավիրուսի պատճառով Էջմիածնի դպրոցներում դասապրոցեսը տապալվել է: Աշակերտների 72 տոկոսը չի հաճախել դպրոց, մյուս մասին էլ դասի կեսից ծնողները տարել են տուն: «Էպիկենտրոն»-ի նկարահանող խումբը եղել է հոգևոր մայրաքաղաքի ուսումնական հաստատություններում, զրուցել տնօրինության, աշակերտների և ծնողների հետ: Կփակվե՞ն դպրոցները, թե՞ ոչ, դեռ քննարկվում է: Մինչև այդ կաթողիկոսի որոշմամբ դասերը դադարեցվել են Էռնեկյանի դպրոցում: Էջմիածնի քաղաքապետն էլ հայտարարել է քարոզարշավը քաղաքում դադարեցնելու և սպորտդպրոցը մեկ շաբաթով փակելու մասին: Վաչիկ Գրիգորյանի տեսանյութը:
Հայաստանի էկոնոմիկայի նախարար Տիգրան Խաչատրյանի և Բելառուսի անտառային տնտեսության նախարար Վիտալի Դռոժժայի համանախագահությամբ Երևանում կայացել է հայ-բելառուսական գործակցության միջկառավարական հանձնաժողովի 14-րդ նիստը: Քննարկվել են երկկողմ գործակցության հեռանկարները, բելառուսական կողմն առաջարկել է Հայաստանում ստեղծել վերելակների համատեղ արտադրություն: Հանդիպումն ավարտվել է արձանագրության ստորագրմամբ: Նիստին հաջորդել է հայ-բելառուսական գործարար համաժողովը:
Կառավարության բակում այսօր կրկին բողոքներ են հնչել: Ամիսներ շարունակ կոմայի մեջ գտնվող փոխգնդապետ Արա Մխիթարյանի հայրն ու հարազատների պահանջը մեկն է՝ արդար դատավարություն: Հայտարարել են՝ եթե այսօր էլ իրենց չլսեն, դիմելու են կտրուկ քայլերի: Միաժամանակ բողոքի հերթական ակցիան են անցկացրել ՁԻԱՀ կենտրոնի աշխատակիցները, կրկին բարձրաձայնել բուժհաստատությունը Նորք ինֆեկցիոնին միացնելու անթույլատրելիության մասին: Քիչ ավելի ուշ սև դիմակներով ու կարմիր թիկնոցներով նրանց պահանջին են միացել ՄԻԱՎ վարակակիրները՝ «Մի՛ վտանգեք մեր կյանքը», «Լսե՛ք մեզ», «Ինչու՞ քանդել այն, ինչն աշխատում է» պաստառներով:
Կառավարության նիստն այսօր սկսվել է կորոնավիրուսի դեմ տարվող պայքարի միջոցառումների մասին տեղեկություններով: Առողջապահության նախարարի խոսքով՝ վարակված վերջին երեք պացիենտները, որոնք հոսպիտալացված են ինֆեկցիոն հիվանդանոցում, այժմ սիմպտոմներ չունեն: Գանգատներ ունի նրանցից միայն մեկը, որն աջակողմյան բազալ թոքաբորբ է: «Նրանց հետ շփում ունեցած 10 անձ արդեն մեկուսացվել է հատուկ պահման վայրում, որտեղ կա ևս 31 հոգի»,- ասել է Արսեն Թորոսյանը: 3 վարակվածներից մեկն Էջմիածնից է, մյուսն էլ՝ Իտալիայի քաղաքացի: Նիստի ընթացքում Մարդու իրավունքների պաշտպանը բարձրացրել է ուսումնական հաստատությունները փակելու հարցը: Վարչապետ Նիկոլ Փաշինյանն էլ Ջերմուկում պատասխանել է հարցին, թե հնարավո՞ր է արդյոք, որ վարակվածների թիվն ավելի մեծ է, քան հայտարարվում է:
Հայաստանի ազգային օլիմպիական կոմիտեի նախագահ Գագիկ Ծառուկյանը հյուրընկալել է պրոֆեսիոնալ բռնցքամարտիկներ Սերգեյ Հակոբյանին ու Պետրոս Անանյանին: Նրանք, թեև բնակվում են արտերկրում, բայց իրենց հաղթանակներով բարձր են պահում հայի անունը: Հանդիպման ընթացքում հայրենական սպորտի ղեկավարն ընդգծել է, որ պատրաստ է ցանկացած հարցում օգնել բռնցքամարտիկներին, որպեսզի նրանք հասնեն նոր հաջողությունների: Պետրոս Անանյանը Գագիկ Ծառուկյանի կողմից պարգևատրվել է Վլադիմիր Ենգիբարյանի անվան ոսկե հուշամեդալով:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv