«Մարդիկ տուն-տեղ են ծախել, որ տոմս առնեն».մեծ հերթեր ու լարված իրավիճակ «Զվարթնոց»-ում
Չնայած Ռուսաստանը Հայաստանի քաղաքացիների համար այսօրվանից մեկ ամսով բացել է օդային սահմանը, սակայն ոչ բոլոր տոմս ունեցողներին է հաջողվել մեկնել: Բազմաթիվ քաղաքացիներ խնդիրներ են ունեցել կորոնավիրուսի թեստի պատասխանի QR կոդի հետ: Շատերը միայն առավոտյան օդանավակայանում են իմացել, որ համակարգում ներառված են միայն երկու լաբորատորիա: Ուղևորահոսքի աճին զուգահեռ կտրուկ թանկացել են նաև ավիատոմսերը: Արտագաղթի նոր ալի՞ք, թե՞ ժամանակավոր արտագնա աշխատանք: Հարցի պատասխանը փորձել է ստանալ մեր գործընկեր Արթուր Հովհաննեսյանը:
Մեկնարկել է սուսերամարտի Հայաստանի երիտասարդների առաջնությունը
Նորագավիթի սուսերամարտի մարզադպրոցում մեկնարկել է սուսերամարտի Հայաստանի երիտասարդների առաջնությունը, որին մասնակցում է ավելի քան 120 մարզիկ: Մրցումների առաջին օրը մեդալներ են խաղարկվել խոցասուսեր և ճկասուսեր զենքաձևերում: Առաջնության բացման արարողությունից առաջ Սուսերամարտի ֆեդերացիայի նախագահ Արմեն Գրիգորյանը ծննդյան 60-ամյակի առթիվ ՀԱՕԿ նախագահ Գագիկ Ծառուկյանի կողմից պարգևատրվել է բարձրագույն շքանշանով:
«Նիկո՛լ, ուղիղ եթերում քեզ հրավիրում եմ բանավեճի». Նաիրա Զոհրաբյան
ԱԺ ԲՀԿ խմբակցության պատգամավոր Նաիրա Զոհրաբյանը Նիկոլ Փաշինյանին ուղիղ եթերում բանավեճի է հրավիրել: Քննարկման թեման Շուշիի հարցն է: «Եթե դու հոկտեմբերի 19-ին ընդունեիր ՌԴ նախագահի առաջարկը, և պատերազմը կանգներ, Շուշին կմնար հայկական վերահսկողության տակ»,- ասել է Զոհրաբյանը: Ի թիվս ներքաղաքական տարբեր հարցերի՝ պատգամավորն անդրադարձել է նաև «Զվարթնոց»-ում այսօր ստեղծված իրավիճակին: Պատգամավորի գնահատմամբ՝ այն ինչ կատարվում էր օդանավակայանում, արմագեդոն էր:
«Սկզբում շատ վատ էր, հետո՝ ուղղակի վատ». 55 օր Բաքվի բերդում անցկացրած Սամվելը վերհիշել է ծանր օրերը
Սամվել Ասատրյանը 55 օր գերության մեջ լինելուց հետո հայրենիք վերադարձած 44 անձանցից մեկն է: Պատերազմի 2-րդ օրը ճակատ մեկնած կամավորականը մեր նկարահանող խմբին պատմել է մարտական դժվարությունների, վիրավորվելու և մեկ շաբաթ վիրավոր մնալուց հետո գերի ընկնելու մասին: Թեպետ հիմա փորձում է կազդուրվել, մոռանալ գլխին եկածը, սակայն գիտի՝ հիշողության մեջ որոշ դրվագներ երբեք չեն մոռացվելու: Դրանցից մեկը Բաքվի բերդում երկու հայի հետ ծանոթությունն է, որը դեռ պիտի քավոր-սանիկությամբ հաստատվի:
«Որևէ մեկին զոռով չենք պահելու». իշխանական պատգամավորը՝ արտագաղթի մասին
«Զվարթնոց» օդանավակայանում գոյացած հերթերին անդրադարձել են պատգամավորները: Հայրենազրկումից հետո Հայաստանը կարող է նաև մարդաթափվել, մտահոգություն է հայտնել «Բարգավաճ Հայաստան» խմբակցության պատգամավոր Միքայել Մելքումյանը: «Լուսավոր Հայաստան»-ից Կարեն Սիմոնյանն էլ նշել է, որ իշխանությունը չունի այն լեգիտիմությունը, որպեսզի կարողանա արգելել քաղաքացիներին լքել երկիրը: Մինչև ընդդիմադիրներն անհրաժեշտ են համարում անհապաղ կանգնեցնել արտագաղթը, իշխանական պատգամավորը հայտարարում է՝ «որևէ մեկին զոռով չենք պահելու»:
«Չեմ ասել հաղթում ենք, ասել եմ հաղթելու ենք». Ա.Հովհաննիսյանը՝ իրեն ուղղված քննադատությունների մասին
Խորհրդարանում անցկացվել են լսումներ «Գիտությունը որպես անվտանգության և զարգացման հենասյուն» թեմայով: Լսումներին մասնակցել է նաև Պաշտպանության նախարարության նախկին ներկայացուցիչ Արծրուն Հովհաննիսյանը: Լրագրողների հետ ճեպազրույցում նա պնդել է՝ հանրությանը որևէ կեղծ ինֆորմացիա չի տրամադրել: «Մինչև վերջին օրը հավատում էի, որ հաղթելու ենք, իսկ եթե ես հավատում էի, դա չի նշանակում, ինչ որ մեկին խաբել եմ»,- ասել է նա: Հովհաննիսյանը նաև նշել է՝ Շուշիի անկումն իր համար անակնկալ էր: «Կան լիքը մարտական դրվագներ, որոնք իմ ուղեղում էլ չեն տեղավորվում»,- ընդգծել է նա՝ հավելելով, որ պատերազմի հետ կապված մտահոգիչ հարցեր կան:
«Պատրոն Դավո»-ն բերման է ենթարկվել, նրա նկատմամբ խափանման միջոց է ընտրվել կալանավորումը
«Պատրոն Դավո» մականունով հայտնի Դավիթ Գալստյանն առանձնապես խոշոր չափերով գումար հափշտակելու կասկածանքով բերման է ենթարկվել: ԱԱԾ-ն պարզել է, որ Գալստյանն ավելի քան 1 միլիոն դոլարի դիմաց ՊՆ-ին մատակարարել է հրանոթի արկեր, որոնք չեն համապատասխանել կնքված պայմանագրին և մարտական խնդրի լուծման համար արդյունավետ չեն եղել: Գալստյանին մեղադրանք է առաջադրվել, նրա նկատմամբ խափանման միջոց է ընտրվել կալանավորումը: