Երևանի ընդհանուր իրավասության դատարանը մերժել է Քաջարանի համայնքապետին կալանավորելու միջնորդությունը: Մանվել Փարամազյանը դուրս գալիս ափսոսանք է հայտնել, որ անհիմն գործի շրջանակներում ինքն ու իր ջոկատի տղաները դիրքերում լինելու փոխարեն ստիպված են գտնվել դատարանում: Փաստաբան Լուսինե Սահակայնը, ծանոթանալով գործի նյութերի հետ, նկատել է՝ իշխանությունը դեռ մայիսից է պլանավորել Սյունիքում տեղի ունեցող գործընթացները: Իսկ դրանց մասին ավելի մասնրամասն պատմել է Գորիսի քաղաքապետ Առուշ Առուշանյանը:

«Հայրենիքի փրկության շարժում»-ն ու վարչապետի հրաժարականը պահանջող քաղաքացիները վաղ առավոտից շրջափակել են կառավարության շենքի բոլոր մուտքերը՝ գործադիրի նիստը տապալելու նպատակով: Ոստիկանությունը տարածքում մեծաթիվ ուժեր է կենտրոնացրել՝ բռնություն գործադրելով քաղաքացիների նկատմամբ.մի քանի տասնյակ ցուցարար բերման է ենթարկվել: Իրավապահները հրմշտել և օղակի մեջ են առել ոչ միայն քաղաքացիներին, այլև ԱԺ «Բարգավաճ Հայաստան» խմբակցության պատգամավորներին: Ակցիաների մասնակիցները կառավարությունից շարժվել են Վազգեն Սարգսյան փողոց և ամոթանք տվել գլխավոր դատախազին՝ Նիկոլ Փաշինյանին պետական դավաճանության համար պատասխանատվության չենթարկելու համար:

«Երկու բնակավայր ունենք, որոնց հետ կապված կարող են ծագել որոշակի հարցեր, մեկը Որոտանի մասին է, երկրորդը՝ Շուռնուխի»,-կառավարության նիստում հայտարարել է Նիկոլ Փաշինյանը: Նրա խոսքով՝ կան որոշակի սահմանային հարցեր, որոնք կարող են որոշակի ցավոտ իրավիճակների բերել: Նիստի ընթացքում գործադիրը կրճատել է անհայտ կորածի կարգավիճակ ձեռք բերելու ժամկետները: Իսկ զինծառայողների ապահովագրության հիմնադրամի միջոցների բավարարման համար դրոշմանիշային վճարները բարձրանալու են: