Վերաքննիչ քրեական դատարանում շարունակվել է քաղաքացի Սուզաննա Պատվականյանի հայցի քննությունն ընդդեմ Հանրապետական ծննդատան տնօրեն Ռազմիկ Աբրահամյանի և փոխտնօրեն Արշակ Ջերջերյանի: Բողոքաբերը պնդում է, որ 2000 թ.-ին իր որդուն վաճառել են, պաշտպանվող կողմն էլ հակադարձում է՝ մայրն է հրաժարվել երեխայից: Պատվականյանը 2012-ին դատական հայցեր է ներկայացրել բժիշկների դեմ, որոնք հանցակազմ չլինելու պատճառով մերժվել են: 1 տարի առաջ, սակայն, ի հայտ են եկել նոր հանգամանքներ:
Չպայթած և վտանգ ներկայացնող ռազմամթերքի վնասազերծման կամ պահեստավորման արդյունքում այսօր Արցախի բնակավայրերը մեծ մասամբ անվտանգ են, հայտնել է Արցախի արտակարգ իրավիճակների պետական ծառայությունը: Միաժամանակ շարունակվում է նաև աճյունների որոնողական աշխատանքները: ՌԴ պաշտպանության նախարարությունն էլ հայտնել է հայ ուխտավորների ՝ Դադիվանքի վանական համալիր կատարած այցի մասին:
Սկանդալային բացահայտում ԱԱԾ-ից: Հայաստանի քաղաքացին, Facebook-ում ներկայանալով որպես ադրբեջանցի, կապ է հաստատել անհետ կորածների ծնողների հետ՝ նրանց հարազատներից տեղեկություններ հայտնելու դիմաց պահանջելով ուղարկել մերկ լուսանկարներ և տեսագրություններ: Պահանջը չկատարելու դեպքում «Ազիզ Մուրադով» տվյալներով գրանցված անձը սպառնացել է սպանել կամ բռնություն գործադրել նրանց հարազատների նկատմամբ: Քննչական կոմիտեն էլ բացահայտել է, որ երկու անձինք փախստականի կարգավիճակ ունեցող արցախցիներից խարդախությամբ հափշտակել են մոտ 14 մլն դրամ:
Երևանի ընդհանուր իրավասության դատարանը քննել է դատախազության և ՀՔԾ անգործության վերաբերյալ փաստաբանների բողոքը: Նրանք պահանջել էին քրեական գործ հարուցել պետական դավաճանության հոդվածով: Կողմերի փաստարկներին ամբողջությամբ ծանոթանալու նպատակով դատական նիստը հետաձգվել է: Մինչև Նիկոլ Փաշինյանին պետական դավաճանության հոդվածով մեղադրանք առաջադրելը, փաստաբաններն առաջարկել են արդեն իսկ քննվող քրեական գործով վարչապետին տալ մեղադրյալի կարգավիճակ:
Պատերազմին որպես պահեստազորային մասնակցած մի խումբ քաղաքացիներ այսօր հավաքվել էին Պաշտպանության նախարարության մոտ: Նրանք պահանջում են վերադարձնել իրենց զինգրքույկները, որոնցում պետք է նշված լինի, որ պատերազմի մասնակից են: Բացի այդ, մոբռեսուրսին նաև դրամական փոխհատուցում է հասնում: Նախարարությունից ակցիայի մասնակիցներին ուղղորդել են դեպի Զորակոչային և զորահավաքային համալրման ծառայություն, որտեղ նրանց խոստացել են լուծել խնդիրը:
Աբովյանի թիվ 1ավագ դպրոցում արդեն 2-րդ շաբաթն է՝ դասերը դադարեցված են: Մանկավարժները, ծնողներն ու աշակերտները հայտարարում են, որ ստեղծված իրավիճակը չի հանգուցալուծվի այնքան ժամանակ, քանի դեռ նախկին տնօրենը չի վերականգնվել իր պաշտոնում: Այսօր արդեն դպրոցի անձնակազմը քաղաքում իրազեկման երթ է իրականացրել՝ ԿԳՄՍ նախարարությանը կոչ անելով չեղյալ հայտարարել տնօրենի ընտրության արդյունքը:
Երևանի մանկապարտեզներում և դպրոցներում հակահամաճարակային սահմանափակումները փոփոխությունների են ենթարկվել: Այսուհետև մեկ խմբում 18 սանի փոխարեն կարող է լինել 20-ը: Ընդարձակ դասարաններում կարող է սովորել 20-ից ավելի երեխա՝ նախկին մեկուկեսի փոխարեն պահպանելով մեկ մետր հեռավորություն: