Հանրապետության օրվա տոնական միջոցառումները Ստեփանակերտում մեկնարկել են երեկ՝ մշակութային հիշարժան իրադարձությամբ: Այս տարի հունվարի 27-ին լրացավ հայ մեծագույն կոմպոզիտոր Տիգրան Մանսուրյանի ծննդյան 80-ամյակը: Սեպտեմբերի 1-13-ը անցկացվում է «Մաեստրո Մանսուրյան» խորագրով համերգաշար, որի մեկնարկը տրվել է Ստեփանակերտի մշակույթի և երիտասարդության պալատում, շարունակվել քաղաքի գլխավոր հրապարակում: Միջոցառումները կայացել են «Երևանի մշակութային օրերը» ծրագրի շրջանակներում:

Արցախի Հանրապետության անկախության օրվա առթիվ բազմաթիվ շնորհավորական ուղերձներ են ստացվել: Հայկական երկրորդ հանրապետության անկախության տոնը շնորհավորել են Արցախի և Հայաստանի նախագահները, վարչապետ Նիկոլ Փաշինյանը, «Բարգավաճ Հայաստան» կուսակցության նախագահ Գագիկ Ծառուկյանը, բարձրաստիճան պաշտոնյաներ, հոգևոր առաջնորդներ ու սփյուռքի կառույցների ղեկավարներ:

Թեժ կրքեր՝ Ուռուցքաբանության ազգային կենտրոնում.Առողջապահության նախարարն աշխատանքից ազատել է կենտրոնի տնօրեն Արմեն Տանանյանին: Կոլեկտիվը դժգոհ է նախարարի որոշումից: Ասում են՝ իրենց ղեկավարից շատ գոհ են ու, եթե Տանանյանը չվերադառնա իր պաշտոնին, ապա աշխատանքից ազատման դիմումների տարափ կսկսվի: Ի դեպ, առաջին կտրուկ քայլն արդեն եղել է: Փոխտնօրեն Վարուժան Շահսուվարյանը գրել է ազատման դիմումը:

Երևանի թիվ 16 հատուկ դպրոցը օրեր առաջ փակվել է: Աշխատակազմն այդ մասին տեղեկացել է մեկ օր առաջ, իսկ աշակերտների ծնողները ծանուցվել են բանավոր: Նրանք չեն պատրաստվում իրենց երեխաներին տեղափոխել այլ դպրոց՝ սոցիալական խնդիրների պատճառով: Կրթության, գիտության, մշակույթի և սպորտի նախարարությունից չեն պատրաստվում խնդրին լուծում տալ, գտնում են, որ այն սոցապխնախարարության իրավասության տիրույթում է: Նախարարության հանրակրթության վարչության պետը չի ցանկացել լսել փակված դպրոցի տնօրենի հիմնավորումները:

Այսօր աշխարհասփյուռ հայությունը տոնում է Արցախի անկախության 28-րդ տարեդարձը։ 1991 թվականի հենց այս օրը Ստեփանակերտում տեղի ունեցավ պատգամավորների մարզային և Շահումյանի շրջանային խորհրդի համատեղ նստաշրջան, որտեղ ընդունվեց «Հռչակագիր Լեռնային Ղարաբաղի Հանրապետության հռչակման մասին»։ Նույն թվականի դեկտեմբերի 10-ին տեղի ունեցավ հանրաքվե, որը հաստատեց Լեռնային Ղարաբաղի անկախությունը։ ԼՂՀ բնակչության 80%-ը մասնակցեց հանրաքվեին, որոնց 99%-ից ավելին քվեարկեց հօգուտ անկախության։ Հանրապետության հռչակման օրը առիթ է մեկ անգամ ևս անդրադառնալ անցած ճանապարհին, հիշել յուրաքանչյուրին, ով իր լուման ունի Արցախի կայացման ու պաշտպանության գործում: Վերածննդի հրապարակից դեպի Ստեփանակերտի հուշահամալիր երթը հենց դա է խորհրդանշել՝ որպես անխախտ ավանդույթ:

«Այսուհետև «պետպատվերը սպառված է» արտահայտությունը հիվանդանոց այցելելիս քաղաքացիները չեն լսի»,- վարչապետ Նիկոլ Փաշինյանի մոտ կայացած աշխատանքային հանդիպմանը հավաստիացրել է առողջապահության նախարար Արսեն Թորոսյանը: «Նախարարությունը բուժհաստատություններին տալիս է բավարար չափով գումար, որ երեխաների համար պետպատվերով վիրահատությունների հերթագրում չլինի, բժիշկները պացիենտից հավելյալ գումար չակնկալեն»,- ասել է Թորոսյանը: Վարչապետն ու նախարարը քննարկել են ոլորտին առնչվող մի շարք հարցեր, խոսել վերջին բարեփոխումներից: Անդրադառնալով թղթային ուղեգրերին՝ Թորոսյանն ասել է, որ շուտով այն հանվելու է, և ամբողջ համակարգը դառնալու է էլեկտրոնային:

Բաքուն նորից սպառնում է: Իլհամ Ալիևի օգնական Ալի Հասանովը հայտարարել է,որ Ադրբեջանի հողերը ազատագրելու արշավը սարերի հետևում չէ: Պաշտոնյայի խոսքով՝ ադրբեջանական բանակը պատրաստ է իր՝ այսպես կոչված «առաքելությանը»: Բաքվից, սակայն, միայն խոսքեր չեն հնչել. այսօր մեկնարկել է հերթական զորավարժությունը՝ այս անգամ Թուրքիայի և Վրաստանի հետ համատեղ: 

Հայաստանի պետական տնտեսագիտական համալսարանի մի խումբ ուսանողներ առավոտից դասադուլ են սկսել: Դասերը բոյկոտած ուսանողները հայտնել են, որ ռեկտորի նախկին պաշտոնակատար Ռուբեն Հայրապետյանի օրոք ԲՈՒՀ-ում մի շարք կրթական բարեփոխումներ են իրականացվել: Պահանջում են Հայրապետյանի վերադարձը: