Փետրվարի 8-ից կիրառվող շարժական արագաչափ  լուսանկարահանող սարքը մեծ դժգոհություն է  առաջացրել շատ վարորդների շրջանում:  Նրանց մի մասը կարծում է, որ այսպես իշխանությունը ցանկանում է  հերթական անգամ կպչել իրենց գրպանին: Ավտովարորդների պաշտպանության լիգայի գլխավոր իրավաբան Մհեր Շահնազարյանի կարծիքով էլ երթևեկությունը կարգավորելու նպատակով  ներդրված  շարժական արագաչափերը արդյունավետ չեն  և էական փոփոխություն չի լինի:  Իրավաբանը կասկածի տակ է դրել նաև շարժական արագաչափերի կիրառման  և դրանց արձանագրած խախտումների օրինականությունը:

Ավարտին են մոտենում ՀՀԿ-ից Հայաստանի նախագահի թեկնածու առաջադրված Արմեն Սարգսյանի հանդիպումները: Մինչև նա կանի հետևություններ ու վերջնական պատասխան կտա գործող նախագահին, արվում են որոշակի հետևություններ:

Ազգային ժողովի Հայաստան-Իսրայել բարեկամական խմբի անդամները ծանրաբեռնված, հագեցած օրակարգով բազմաթիվ հանդիպումներ են ունեցել Իսրայելում: Պատվիրակության անդամները քառօրյա գործուղման ընթացքում ունեցել են 15 հանդիպում Կնեսետի, Կառավարության, բիզնեսի, հայ համայնքի, Պատրիարքարանի ներկայացուցիչների հետ:  Բարեկամական խմբի անդամների օրակարգի հարցերից է եղել հայոց ցեղասպանության դատապարտումը, Արցախի խնդիրը, գյուղատնտեսական ու բնապահպանական  հարցեր: Ինչ են քննարկել ու ինչ պայմանավորվածություններ են ձեռք բերել պատվիրակության անդամները:

Ելք խմբակցության նախաձեռնությամբ և Ծառուկյան խմբակցության աջակցությամբ այսօր հրավիրվել էր ԱԺ արտահերթ նիստ, որի օրակարգում մեկ հարց էր՝ Հարկային օրենսգրքի փոփոխություն: Ընդդիմադիր ուժերն իրենց առաջարկներն են ներկայացրել, թե ինչպես զսպել համատարած գնաճի տեմպը: Առաջարկվում է ակցիզային հարկը, ավելացված արժեքի հարկը և եկամտահարկը վերադարձնել 2017 թ ավարտին գործող դրույքաչափերին: Կառավարությունն ու մեծամասնությունը փոփոխությունների առաջարկին դեմ են արտահայտվել, նախագիծը մերժվել է: