Այսօր տեղի է ունեցել կառավարության հերթական նիստը, որը վարել է վարչապետ Կարեն Կարապետյանը: Քաղաքաշինության պետական կոմիտեի ուսումնասիրության համաձայն շինարարության ոլորտի վիճակագրական տվյալների հավաքման գործում կան որոշակի խոչընդոտներ: Դրանք նվազեցնում են վիճակագրական տվյալների լիարժեքությունը, հատկապես մասնավոր կազմակերպությունների միջոցով իրականացվող շինարարական ծավալների,- նշել է գործադիրի ղեկավարը: Նա հանձնարարել է արձանագրել շինարարության ոլորտում վիճակագրության ամբողջականության  ապահովման և տվյալների հավաքման իրական վիճակը:

 Կարեն Կարապետյանը ներկայացրել է մակրոտնտեսական ցուցանիշների աճը և 2018 թվականին նախատեսված բյուջեի եկամուտները, դեֆիցիտը և ծախսը: Անդրադառնալով ներդրումներին, Կարեն Կարապետյան հիշեցրել է, որ կառավարության  հայտարարած 830-850 մլն դոլարի ներդրումը ներառում են պետական եւ մասնավոր ներդրումները: Կարեն Կարապետյանը տեղեկացրել է, որ հարկային նոր օրենսգրքում կան կետեր, որոնք ընդունվել են դժվարությամբ:

 Անհատ տնտեսվարողները դեմ են հունվարի մեկից շրջանառության մեջ մտնող  հարկային նոր օրենսգրի որոշ դրույթներին: Ձեռներեցների համար ավելանում է թղթաբանությունը, կոշտացվում է վարչարարությունը: Ծառուկյան դաշինքի պատգամավորները անհատ տնտեսվարողների կողքին են լինելու  խնդրի լուծման հարցում:

2018 թ. պետական բյուջեի նախագիծն այսօր քննարկել է նաև ԱԺ Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովը: Գյուղատնտեսության, բնապահպանության, տարածքային կառավարման և զարգացման նախարարները, նաև հանրապետության մարզպետները ներկայացրել են գալիք տարի իրենց ղեկավարած նախարարություններին և մարզպետարաններին հատկացված ֆինանսներն ու պատասխանել պատգամավորների հարցերին:

Եվրաինտեգրման հարցերի հանձնաժողովի նիստում 2018-ի բյուջեի նախագծի քննարկման ժամանակ ԱԳ փոխնախարար Կարեն Նազարյանը հայտարարել է, որ Հայաստանի եւ Եվրամիության շրջանակային համաձայնագիրը բավական հավակնոտ է ստացվել։  Փաստաթղթի իրականացումը Եվրոպական Միության հետ մեր երկկողմ հարաբերություններում կարևոր քայլ կհանդիսանա,- ասել է փոխարտգործնախարարը: Ծառուկյան խմբակցության պատգամավորները հետաքրքրվել են, թե ինչ է սպասվում վիզաների ազատականցման համար եւ արդյոք համաձայնագրի ստորագրումը վերջնական է թե ոչ: